प्रधानमन्त्रीले फेसबुकबाट दिए प्रचण्डलाई जवाफ
काठमाडौं । प्रधानमन्त्री केपी शर्मा ओलीले पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डलाई फेसबुकबाट जवाफ फर्काएका छन् ।
सोमबार दिउँसो प्रचण्डले संसदको प्रतिनिधि सभामा बोल्दै प्रधानमन्त्री ओलीलाई काम गर्न भन्दा शिलान्यास गर्न र त्यसको जसलिन मात्रै हतार हुने बताएका थिए। प्रचण्डले त्रिभुवन विश्वविद्यालयको क्रीकेट मैदानमा फ्लडलाइट जडान र प्याराफिट निर्माणको काम आफ्नै पालामा टेन्डर प्रतिक्रिया सुरु भएको तर, अहिले प्रधानमन्त्रीले हतारमै जसलिन खोजेको भनेका थिए।
त्यसको जवाफ फेसबुकमा लेख्दै प्रधानमन्त्री ओलीले भनेका छन् -‘पूर्वप्रधानमन्त्री पुष्पकमल दाहालजीले आज प्रश्न सोध्नु भएछ– कीर्तिपुरको मैदानमा खोई फ्लडलाइट ? खोई प्यारापिट ?
मेरो उहाँलाई आग्रह छ, बनिरहेको प्यारापिट हेर्न जानुस्, जडान हुँदै गरेको फ्लडलाइटका पोल हेर्न जानुस् । बनिरहेको छ ।’
प्रधानमन्त्रीले अझै अगाडि लेखेका छन्,-‘तपाईं प्रधानमन्त्री हुँदा कुनै पनि कामलाई टाइमलाइन तोकेर गर्छु भन्नु भएन र तपाईंले केही गर्नु पनि परेन र गर्नु पनि भएन । सरकारको कामबारे तथ्यतथ्यांक राखेर तपाईंले प्रधानमन्त्रीको रुपमा जवाफ पनि दिनु परेन। तपाईंका त न कुनै वाचा, न कुनै निर्णय, न कुनै संकल्प, न कुनै काम । मैले त दिन तोकेर गर्छु भनें, आफैंमाथि प्रश्न आह्वान गरें र काम पनि गरें । तपाईंले जर्जर छोडेको अर्थतन्त्र अहिले कहाँ पुग्यो, तथ्याङ्क हेर्नुस् भन्ने सुझाव दिन चाहन्छु ।’
Rupee Exchange Rate