भेडाच्याङ्ग्रा बेच्न महिनौँ पैदल हिँडेका किसानलाई बजारको चिन्ता

म्याग्दी । दसैंका लागि भेडाच्याङ्ग्रा बेच्न मुगुबाट हिँडेका किसान ३६ दिनको कष्टकर यात्रापछि म्याग्दीको गलेश्वर आइपुगेका छन् । प्रतिकूल मौसम, हिमपात र सडक अवरोधका कारण लामो समय लागेको यात्रापछि बजारसम्म आइपुग्दा पनि समयमै बिक्री गर्न पाइने हो वा होइन भन्ने चिन्ताले उनीहरूलाई सताएको छ ।

मुगुको छायानाथ रारा नगरपालिका–६ का सञ्जय बिकसहित चार जनाको टोली दुई सय भेडाच्याङ्ग्रा लिएर शुक्रबार साँझ गलेश्वर आइपुगेको हो । तीमध्ये एक सय भेडाच्याङ्ग्रा आफ्नै घरमा पालेका र एक सय छिमेकीबाट खरिद गरेका हुन्। दसैँमा पोखरामा बिक्री गर्ने उद्देश्यले उनीहरू भदौ १८ गते घरबाट हिँडेका थिए ।

‘यसपालि प्रतिकूल मौसम र मुस्ताङ जोड्ने बेनी–जोमसोम सडक अवरुद्ध हुँदा धेरै दुःख पाइयो’ बिकले भने, ‘डोल्पाको छार्कामा हिमपात भएपछि एक हप्ता रोकियौँ। घरबाट हिँडेको ३६ दिनमा बल्ल गलेश्वर आइपुगेका छौँ।’

शनिबार गलेश्वरबाट भेडाच्याङ्ग्रा गाडीमा राखेर पोखरा लैजाने उनीहरूको योजना छ । तर, दसैं नजिकिँदै गर्दा बजारमा माग र बिक्री कस्तो होला भन्ने चिन्ता छ । ‘ढिला भइसकेको छ। अब बजारमा बिक्री हुने हो कि होइन भन्ने चिन्ता लागेको छ’ बिकले भने ।

डोल्पाको काइके गाउँपालिका–२ का मानप्रसाद रोकायासहित सात जना किसान पनि सात सय भेडाच्याङ्ग्रा लिएर पोखरातर्फ लागेका छन् । उनीहरू शुक्रबार म्याग्दीको घोडेपानी हुँदै पोखरातर्फ गएका हुन्। घरबाट हिँडेको २२ दिन भइसकेको रोकायाको टोलीको मुख्य पेसा नै भेडाच्याङ्ग्रापालन हो । उनीहरू हरेक वर्ष बिक्रीका लागि विभिन्न बजार पुग्ने गर्छन्। तर, यसपालि बाढीपहिरोले यात्रामा थप सास्ती दिएको छ ।

सडक अवरुद्ध हुँदा बजार पुग्न ढिलाइ

असोज ८ देखि ११ गतेसम्मको वर्षापछि आएको बाढीपहिरोले बेनी–जोमसोम सडकको म्याग्दी खण्ड अवरुद्ध बनाएको थियो । यसले भेडाच्याङ्ग्रा पैदल खेदाएर ल्याउने र सवारीसाधनबाट ढुवानी गर्ने दुवै काम प्रभावित भए। सडकको अवस्थाका कारण कतिपय किसानले लामो दूरी पैदल हिँड्नुपरेको छ ।

डोल्पाको काइके गाउँपालिका–२ सहरताराका सञ्जय बुढा पनि २५ दिन पैदल हिँडेर एक सय ६० च्याङ्ग्रा बिक्रीका लागि पोखरातर्फ लागेका छन् । समुद्री सतहदेखि चार हजार मिटरभन्दा माथिका क्षेत्रमा पालिएका च्याङ्ग्रा खेदाएर बजारसम्म ल्याउन सहज छैन ।

‘भिर, खोल्सा र साँघुरो बाटोमा च्याङ्ग्रालाई हिँडाएर बजार पुर्‍याई बिक्री गर्नु हाम्रो परम्परादेखिकै पेसा हो’ उनले भने ।

दसैं नजिकिएसँगै हिमाली क्षेत्रबाट भेडाच्याङ्ग्रा बजार झर्ने क्रम बढेको छ । तर, प्रतिकूल मौसम र सडक अवरोधले यसपालि किसान तथा व्यापारी प्रभावित भएका छन्। डोल्पा, जुम्ला र उपल्लो मुस्ताङबाट भेडाच्याङ्ग्रा लिएर आएका किसान तथा व्यापारीको जोमसोमदेखि बेनीसम्म चहलपहल छ ।

मुस्ताङबाट बेनी–जोमसोम सडक हुँदै गलेश्वर ल्याइएका भेडाच्याङ्ग्रा ट्रक र कन्टेनरमा राखेर पोखरा, काठमाडौंलगायत सहरमा पठाउन थालिएको छ । यद्यपी, डोल्पाबाट मुस्ताङ आउने बाटो हिउँले ढाकिँदा त्यहाँका सबै किसानले भेडाच्याङ्ग्रा बजारसम्म ल्याउन नसकेको कृषि तथा पशुपन्छी विकास कार्यालय मुस्ताङका प्रमुख लालमणि अर्यालले बताए ।

तातोपानी र रसुवा नाका बन्द भएकाले यसपालि ठूला सहरमा भेडाच्याङ्ग्रा आपूर्तिको मुख्य मार्ग मुस्ताङ बनेको छ। जोमसोममा भेडाच्याङ्ग्राको स्वास्थ्य परीक्षण गरी निकासी अनुमति दिने व्यवस्था मिलाइएको छ। कार्यालय प्रमुख अर्यालका अनुसार हालसम्म १० हजार भेडाच्याङ्ग्राको स्वास्थ्य परीक्षण गरेर निकासी अनुमति दिइएको छ। गत वर्ष १८ हजार भेडाच्याङ्ग्रा निकासी भएका थिए ।

यात्रा लम्बिँदा लागत बढ्यो

लामो यात्राका कारण किसान र व्यापारीको खर्च बढेको छ। मुस्ताङमा सडक, विद्युत् र सञ्चार सेवा अवरुद्ध हुँदा किसानसँग सम्पर्क गर्नसमेत कठिन भएको व्यापारीको भनाइ छ।

बेनी नगरपालिका–९ का व्यापारी डेकबहादुर चोखालका अनुसार मुस्ताङमा असोज दोस्रो सातादेखि सडक, विद्युत् र सञ्चार सेवा अवरुद्ध हुँदा भेडाच्याङ्ग्रा खरिदमा समस्या भएको थियो।

‘किसानसँग सम्पर्क हुन नसकेपछि भनेजस्तो भेडाच्याङ्ग्रा ल्याउन पाइएन’ उनले भने ।

व्यापारीका अनुसार मुस्ताङमा आकारअनुसार भेडा प्रतिगोटा ३२ हजारदेखि ३५ हजार रुपैयाँ र च्याङ्ग्रा करिब ४० हजार रुपैयाँमा खरिदबिक्री भइरहेको छ। बेनीमा भने भेडा प्रतिगोटा करिब ३६ हजार र च्याङ्ग्रा ४५ हजार रुपैयाँ पर्ने बेनी नगरपालिका–९ तोरीपानीका यामबहादुर बानियाँले बताए ।

‘पाँच वर्ष उमेर पुगेका च्याङ्ग्रा मासुका लागि उपयुक्त मानिन्छन्’ उनले भने, ‘महँगो परे पनि दसैँमा हिमाली क्षेत्रमा जडीबुटीयुक्त बुकीमा चरेका च्याङ्ग्राको मासु खाने चलन छ ।’

मुस्ताङी भेडाच्याङ्ग्राको ठूलो बजार पोखरा र काठमाडौं हुन्। म्याग्दी, बागलुङ, पर्वत, स्याङ्जा, तनहुँ र लमजुङमा पनि यसको माग हुने गरेको धवलागिरि गाउँपालिका–७ का खसी व्यापारी प्रेम छन्त्यालले बताए ।

च्याङ्ग्रापालनमै निर्भर हिमाली किसान

मुस्ताङको नामग्यालका किसान तेन्जिङ गुरुङले च्याङ्ग्रापालन आफ्नो मुख्य आयस्रोत भएको बताए । मुस्ताङका वारागुङ मुक्तिक्षेत्र, घरपझोङ, लोघेकर दामोदरकुण्ड र लोमान्थाङ गाउँपालिकामा करिब ५० हजार च्याङ्ग्रा पालिएका छन्। उपल्लो मुस्ताङका किसानको मुख्य आयस्रोत नै च्याङ्ग्रापालन हो। च्याङ्ग्राको शरीरबाट निस्कने भुवा पस्मिनाको कच्चा पदार्थका रूपमा प्रयोग हुन्छ।

तर, च्याङ्ग्रापालनमा पनि विभिन्न चुनौती छन् । हिउँचितुवा र ब्वाँसोको आक्रमणबाट पशु जोगाउन किसानलाई कठिन हुन्छ। पर्याप्त हिउँ नपर्दा लेकाली क्षेत्रमा घाँस कम उम्रिने र आहार अभाव हुने समस्या छ। हिउँदमा अत्यधिक हिमपात हुँदा पनि आहार नपाएर भेडाबाख्रा मर्ने गरेका छन्।

दसैंको बजारबाट वर्षभरिको आम्दानी जुटाउने आशामा किसानले हिमालबाट भेडाच्याङ्ग्रा खेदाएर ल्याउने गर्छन्। तर, यसपालि प्रतिकूल मौसम र सडक अवरोधले उनीहरूको यात्रा लम्बिएको छ। लामो पैदल यात्रा, बढ्दो खर्च र बजार पुग्न भएको ढिलाइले किसानको आम्दानी प्रभावित हुने चिन्ता बढाएको छ।

Comments