तराईमा बाक्लो हुस्सुसँगै चिसो शीतलहरले जनजीवन प्रभावित

चन्द्र पौडेल

मोरङ, २४ मंसिर । मोरङसहित तराईका अधिकांश क्षेत्रमा दुई दिनदेखि बाक्लो मात्रामा हुस्सु शीतलहर सुरू भएसङै चिसो स्याँठ चल्दा जनजीवन प्रभावित बनेको छ । यस क्षेत्रमा शुक्रबारबाट चिसो एक्कासि बढेको हो । यहाँ शनिबार पनि बिहानैबाट बाक्लो मात्रामा हुस्सु लागेर शीत झरिरहेको छ ।

 

चिसो बढ्दा विपन्न, गरिब, मजदुर र पिछडिएको दलित परिवार प्रभावित हुन थालेका छन् । चिसो छल्न प्रत्येक बस्तीका बासिन्दा आगो बालेर तापिरहेका छन् । तराई मधेसका डोम, मुसहरलगायत अति पिछडिएको दलित तथा विपन्न परिवारमा चिसो छल्न आवश्यक मात्रामा न्यानो कपडा छैन ।

मङ्सिर अन्तिमतिर आएर बाक्लो हुस्सु लागेर चिसो बढ्दा बालबालिका, वृद्ध वृद्धा दैनिकी ज्यालामजदुरि गरेर खाने र शारीरिक रूपमा अशक्त व्यक्ति बढी प्रभावित भएका छन् ।

चिसो बढ्दा घाँटी, टाउको र छाती दुख्ने, रुघाखोकी लाग्नेजस्ता चिसो जन्य सङ्क्रमणका बिरामी बढेका चिकित्सकले बताएका छन् । डाक्टर दिनेश महतोले चिसो स्याँठ चलेको र बाक्लो हुस्सु लागेको समयमा सकेसम्म घरभित्रै बस्न सुझाव दिनुभएको छ ।

उहाँले यो समयमा न्यानो कपडा लगाउन, सुरक्षितसँग आगो तापेर बस्न र ताता तथा पोसिला खानेकुरा खान सुझाव दिनुभएको छ । हुस्सु लाग्न सुरु भएसँगै तराई क्षेत्रका किसान दलहन तथा तेलहन बाली र तरकारी खेती प्रभावित हुने भन्दै चिन्तित बनेका छन् ।

हुस्सु लाग्न थालेपछि गोलभेँडा, आलु, तोरीलगायतका बाली प्रभावित हुने किसानले बताएका छन् । बाक्लो मात्रामा हुस्सु लाग्दा पूर्व–पश्चिम राजमार्ग र अन्य भित्री सडकमा सवारी साधन दिउँसो पनि बत्ती बालेर गुडिरहेका छन् ।

Comments

सम्बन्धित शीर्षकहरु

आजको लोकप्रिय