एसिया कप क्रिकेटमा पाकिस्तानसँग नेपालको फराकिलो हार
काठमाडौं, १३ भदौ । एसिया कप क्रिकेटको पहिलो खेलमा नेपाल फराकिलो अन्तरले पराजित भएको छ । नेपाल पाकिस्तानसँग २३८ रनले पराजित भएको हो ।
पाकिस्तानले दिएको ३४२ रनको विशाल लक्ष्य पछ्याएको नेपालले २३.४ ओभरमा अलआउट हुँदै १०४ रन मात्र बनाउन सक्यो ।
नेपालका लागि सोमपाल कामीले सर्वाधिक २८ रन बनाए भने आरिफ शेखले २६ रन बनाए । गुल्शन झाले १३ रन बनाए । अन्यले दोहोरो अंकमा रन बनाउन सकेनन् ।
पाकिस्तानका लागि शादाब खानले ४ विकेट लिँदा हारिस राउफ र शाहिन अफ्रिदीले २-२ तथा नसीम साह र मोहम्मद नवाजले १-१ विकेट लिए ।
त्यसअघि टस जितेर पहिले ब्याटिङ गरेको पाकिस्तानले निर्धारित ५० ओभरमा ६ विकेट गुमाएर ३४२ रन बनाएको थियो । कप्तान बाबर आजमले १५१ रनको उत्कृष्ट पारी खेल्दा इफ्तिकार अहमद १०९ रनमा अविजित रहे ।
नेपालका लागि सोमपाल कामीले २ विकेट लिँदा करण केसी र सन्दीप लामिछानेले १-१ विकेट लिए ।
नेपालले अब दोस्रो खेलमा भदौ १७ गते भारतसँग खेल्ने छ ।
Rupee Exchange Rate