पन्चासेमा हाई अल्टिच्युड खेलमैदानको उद्घाटन

परेवान्युज | मंसिर १७ गते, २०८१ - ०६ः४४ मा प्रकाशित

पोखरा । पोखरा महानगरपालिका वडा नं.२३ पन्चासे भन्ज्याङमा निर्माण गरिएको हाई अल्टिच्युड खेलमैदानको आज एक कार्यक्रमका बिच उद्घाटन गरिएको छ ।

समुन्द्र सतहदेखि २ हजार ६५ मिटरको उचाइमा निर्माण गरिएको उक्त मैदानको पोखरा महानगरपालिकाका प्रमुख धनराज आचार्यले उद्घाटन गरे। पन्चासे भन्ज्याङमा बाला चतुर्दशीको अवसरमा हरेक वर्ष पञ्चासे आदर्श क्लबद्वारा पञ्चासे बाला चतुर्दशी तथा भलिबल प्रतियोगिता आयोजना हुँदै आएको र सोही अवसरमा खेल मैदान उद्घाटन गरिएको हो।

सो अवसरमा पञ्चासेलाई जैविक विविधता र धार्मिक तथा पर्यापर्यटनको हबका रूपमा विकास गरिने नगर प्रमुख आचार्यले बताए। पञ्चासे क्षेत्र फेवातालको प्रमुख जलाधार क्षेत्र रहेको उल्लेख गर्दै उनले यसको प्राकृतिक तथा जैविक अवस्थामा असर नपर्ने गरी विकास गर्न विभिन्न विकास साझेदारहरूसँग सहकार्य गरिरहेको जानकारी दिए।

पञ्चासेमा बालाचर्तुदशीका दिन हजारौँ श्रद्धालु भक्तजनहरू पुग्ने गरेकाले भन्ज्याङसम्म सुविधा सम्पन्न सडक निर्माणको प्रक्रिया अगाडी बढिसकेको उनले बताए । पामेदेखी घाँटीछिना हुँदै भन्ज्याङ र हर्पन हुँदै भन्ज्याङसम्म पुग्ने सडकको ट्र्याक खोलिसकिएको र नाला समेत निर्माण भइरहेकाले यो सडक सङ्घ, प्रदेश र महानगरपालिकाको समेत लागतमा निर्माण भइरहेको उनको भनाइ थियो।

भन्ज्याङसम्म पुग्ने सडक कालोपत्रेका लागि दिगो पर्यटन विकास अन्तरगत एसियाली विकास बैङ्कसँग साझेदारी गरिएको र त्यहाँबाट पञ्चासेसम्म पुग्नका लागि भने सुविधायुक्त सिँढी बाटो निर्माण तथा मर्मत गरिने पनि प्रमुख आचार्यले बताए।पञ्चासे क्षेत्र विश्व मै धेरै प्रजातिका अर्किडहरु पाइने स्थान भएकाले यसको संरक्षण तथा विकासका लागि महानगरपालिका प्रतिबद्ध रहेको पनि नगर प्रमुख आचार्यले जानकारी दिए।

भन्ज्याङमा निर्माण गरिएको खेलमैदान पोखरा महानगरपालिकाको रु.२५ लाख, गण्डकी प्रदेश सरकारको रु.५ लाख, आदर्श क्लबको रु.३ लाख ७५ हजार र स्थानीय भक्त बहादुर गुरुङको रु.८० हजार लागतमा निर्माण भएको हो ।