जात व्यवस्था विरुद्ध आगो हो ‘पुजार सार्की’ !

दिनेश राउतको निर्देशन र सुभाष भुसालको निर्माणमा तयार भएको फिल्म ‘पुजार सार्की’ देश तथा विदेशमा एकसाथ रिलिज भएको छ ।देशभर ३ सय भन्दा बढी र ४० देशका २८० पर्दामा चलचित्र ‘पुजार सार्की’ चलिरहेको छ।

बुद्धपुर्णिामाको सार्बजनिक बिदाको दिनलाई लक्षित गरि प्रदर्शनमा ल्याइएको फिल्मको २ दिनको व्यापार सुखद छ । आज शनिबार पनि अधिकांश हल हाउसफूल छ। बिहानैबाट हलहरुमा दर्शकको चाप बढेको देख्न सकिन्छ। विकास सुवेदीको लेखनमा तयार भएको यो फिल्मले वि.सं २०४६ सालदेखि हालसम्मको कथा भन्छ ।

जातीय विभेदलाई नै मुख्य बिषय बनाइएको भएपनी फिल्ममा २०४६ सालको अन्त्यतिर पन्चायती व्यवस्थाको विरुद्ध भएको आन्दोलन र त्यसपछी बहुदलीय व्यवस्था आएपनी पुरानै अनुहार र शासकले कसरी जात व्यवस्थाको विरुद्ध जुर्मुराएका युवालाई भूलभुलैया राख्छन् र आफ्नो स्वार्थ पूरा गर्छन् भन्ने देखाइएको छ। यसमा केही संवाद र पात्र तत्कालीन अवस्थामा त्यो गाउँमा घटेकै घटना जस्तो लाग्छ। केही पात्रको नाम र काम समेत मेल खान्छ! यद्यपि चलचित्रले ‘कोही कसैसँग मेल खाएमा संयोग मात्रै’ भन्ने कुरालाई न्याय गरिदिएको छ।

चलचित्रका तीन नायकहरू आर्यन सिग्देल, प्रदीप खड्का र पल शाहले कथाको मर्म अनुरुप आफ्नो भुमिकामा अब्बल अभिनय गरेका छन् ।साथमा नायिकाद्वय अन्जना बराइली र परीक्षा लिम्बुको पनि अभिनय दमदार छ। शंकर आचार्य,सुभाष गजुरेल र छोटो भुमिका निभाएका प्रकाश घिमिरे पनि चलचित्रलाई डोहोर्‍याउन सफल देखिएका छन् ।

फिल्ममा तीन नायक भएपनि प्रदीप खड्का हाबी देखिन्छन्। पल शाहको करियरको दोस्रो प्रवेश सुखद छ । क्रान्तिकारी चेतना र बिद्रोहको नायक बनेका पललाई अन्तिम सम्म दर्शकले देख्न सक्छन् । आर्यन सिग्देलको पुजार कर्म र अन्तर्जातिय प्रेम सम्बन्धले ल्याएका उतारचढाव हेर्न लायक छ। चलचित्रमा उनीहरुको बिद्रोहले समाजलाई कति बदल्छ वा बिद्रोह दबाउने पन्च नै बहुदलमा समेत हावी भएपछि के हुन्छ ? त्यसको लागि चलचित्र हल सम्म पुग्नुपर्छ ।

कास्कीको पोखरा नजिकै फेवाताल माथिको कास्कीकोट(हाल पोखरा महानगरपालिका-२४) तत्कालीन कास्कीकोट गाउँ पन्चायत र पछि कास्किकोट गाविसमा केही समय अगाडि घटेको जातीय छुवाछूत घटनालाई समेत छुनेगरी त्यहीँको स्थानीय भाषा र रहनसहनलाई टपक्कै टिपेर निर्माण गरिएको २ घन्टा १५ मिनेट लामो यो फिल्मलाई नायक प्रदीप खड्काले पुरै समय होल्ड गरेका छन् । शिर्ष भुमिका ‘पुजार’ बनेका आर्यन सिग्देल र विद्रोही नायकको रुपमा देखिएका पल शाहले चलचित्रलाई थप बलियो बनाएका छन् ।

तर, प्रदीप खड्काको कमेडी संवाद, उनको हाउभाउ सहितको अभिनय अनि फरक खालको ल्याङफ्याङ र केही कुरा मनमा अड्याउन नसक्ने केटो बनेको दर्शकको लागि छुट्टै स्वाद हुनसक्छ। यो भन्दा बढी उत्सुकता भएमा फिल्म हलमै पुगेर उत्सुकता मेटाउने दर्शकले ‘पैसा खेर गयो’ भन्ने अवस्था आउँदैन।

Comments