राष्ट्रियसभामा एक्लै लड्दा १७ सिट जित्‍ने कांग्रेस गठबन्धन गर्दा जम्मा ७ सिटमा खुम्चिने !

परेवान्युज | पौष २१ गते, २०८० - ११ः२४ मा प्रकाशित

काठमाडौं, २१ पुस । आगामी माघ ११ मा हुने राष्ट्रिय सभा निर्वाचनमा गठबन्धन दलभित्र नै भागबन्डा मिलाउन सकस देखिइरहेका बेला प्रमुख प्रतिपक्षी दल एमाले समेत ‘महागठबन्धन’ गर्न तम्सिएको छ।

भागबन्डा गर्ने यो प्रयास सफल भएका १९ सिटमा कम्तीमा गठबन्धनका ६ सहित ७ दलले भाग लगाउने छन् । त्यसमा अझै संसदको चौथो र पाचौं शक्ति राष्ट्रिय स्वतन्त्र पार्टी र राष्ट्रिय प्रजातन्त्र पार्टी पर्दैन। नेपाली कांग्रेस,नेकपा एमाले,नेकपा माओवादी केन्द्र ,नेकपा एकीकृत समाजवादी, जनता समाजवादी, जनमत पार्टी र नागरिक उन्मुक्ति पार्टीले भागबन्डा गर्न चाहेका छन् । यद्यपि जनमत र नागरिक उन्मुक्तिले भाग पाउने नपाउने निश्चित छैन।

तर,अचम्मको कुरा के छ भने यदि यसरी भागबन्डा नगर्ने र सबै दल एक्लाएक्लै चुनाव लड्ने हो भने नेपाली कांग्रेस र नेकपा एमालेले मात्रै जित्ने देखिन्छ। प्राप्त मतभार हेर्ने हो भने कांग्रेस एक्लैले १७ सिट सम्म जित्न सक्छ भने बाकी २ सिट एमालेले जित्ने देखिन्छ।

तर,आफुले एक्लै लड्ने हिम्मत कांग्रेस र एमाले दुवैसँग छैन। त्यसैले यी दुबै दल सहित सत्तामा रहेका अन्य दल समेत मिलिजुली भागबन्डा गर्ने मुडमा छन् । भागबन्डाको लागि प्रधानमन्त्री पुष्पकमल दाहाल प्रचण्ड सहित पुर्व प्रधानमन्त्रीद्वय कांग्रेस सभापति शेरबहादुर देउवा र एमाले अध्यक्ष एमालेबिचमा भेटघाट बाक्लिएको छ। त्यसो त यो भेटघाटले अन्तिम रुप भने पाएको छैन। कांग्रेस सभापति देउवाले राष्ट्रिय सभा निर्वाचनको लागी गठबन्धन भित्र एमालेलाई सहभागी नगराउने बताइसकेका छन् ।

प्रधानमन्त्री समेत रहेका माओवादी अध्यक्ष प्रचण्डले एमाले अध्यक्ष ओलीसँग नजिक रहेर छलफल शुरु गरेपछि अन्य सत्ता सहयात्री दलहरू भने झस्केका छन् । यसमा बिशेषगरि नेकपा एस र जसपाले सिट कम पाउने भएपछि एमालेलाई राष्ट्रिय सभा निर्वाचनमा ‘शुन्य’ बनाउने अवसरको सदुपयोग गर्नुपर्ने बताइरहेका छन् ।

सत्ता गठबन्धन माथी एमाले सहितको महागठबन्धन बनेर भागबन्डा गरिएमा एमालेले ४ वा ५ सिट लैजाने देखिन्छ। यसो हुँदा समाजवादी र जसपा अहिलेकै अवस्थामा रहन्छन् भने नागरिक उन्मुक्ति र जनमतले भाग नै नपाउने खतरा देखिन्छ।

आगामी फागुन २० देखि एमालेको राष्ट्रपतिबाट मनोनीत १ समेत ९, कांग्रेसका ४, माओवादीका ३, एकीकृत समाजवादीका २, जसपाका १ र स्वतन्त्र सांसद १ जना गरी २० सांसदको पदावधि सकिँदै छ । जसमा कोशी प्रदेशबाट २, मधेस प्रदेशबाट २, बागमती प्रदेशबाट ४, गण्डकी प्रदेशबाट ३, लुम्बिनी प्रदेशबाट २, कर्णालीबाट ३ र सुदूरपश्चिम प्रदेशबाट ३ सदस्यका लागि निर्वाचन हुने छ ।यसकालागि निर्वाचन आयोगले शुक्रबार मतदाता नामावली प्रकाशन समेत गरिसकेको छ। २०७८ को जनगणनाको प्रतिवेदनअनुसार प्रदेश सभाको सांसदको मतभार ५३ र पालिकाका प्रमुख–उपप्रमुखहरूको मतभार १९ तोकेको छ ।

निर्वाचन आयोगले प्रकाशित गरेको मतदाता नामावली र यिनको मतभार गणना गरेर हेर्दा यदि दलहरू एक्लाएक्लै लड्ने हिम्मत गरेमा कांग्रेसले १९ मा १७ सिटमा जित हासिल गर्ने देखिन्छ । बाँकी दुई सिटमा एमाले निर्वाचित हुने अवस्था छ । यो सातै प्रदेशको मतभारले देखाएको तथ्यांक हो। जसमा एमाले कोशी प्रदेशमा मात्रै अगाडी देखिन्छ।