विश्वकपको वार्म अप खेलमा नेपाल क्यानडासँग पराजित
काठमाडौं, १५ जेठ । आइसिसी टी-२० विश्वकप अघिको पहिलो वार्म अप खेलमा नेपाल क्यानडासँग पराजित भएको छ । डलासको प्रेरी भ्यु मैदानमा भएको खेलमा क्यानडाले नेपाललाई ६३ रनले हराएको हो ।
क्यानडाले दिएको १८४ रनको बलियो लक्ष्य पछ्याएको नेपाल १९ ओभर ३ बलमा १२० रनमा समेटियो। नेपालका लागि कुशल मल्लले सर्वाधिक ३७ रन बनाए । त्यस्तै अनिल कुमार साहले २४ तथा आसिफ शेखले २२ रन बनाए ।
क्यानडाका लागि डिलोन हेलिङ्गरले २.३ ओभरमा २० रन दिएर ४ विकेट लिए । कप्तान साद बिन जफरले ४ ओभरमा २५ रन दिएर २ विकेट लिए । जेरेमी गोर्डोनले ४ ओभरमा २५ रन दिएर २ विकेट लिए । कलिम साना र पर्गत सिंहले एक-एक विकेट लिए ।
त्यसअघि टस हारेर पहिले ब्याटिङको निम्तो पाएको क्यानडाले निर्धारित २० ओभरमा ७ विकेट गुमाएर १८३ रन बनायो । क्यानडाका लागि निकोलस किर्टनले सर्वाधिक ५२ रन बनाए । त्यस्तै रविन्दरपाल सिंह ४१ रनमा अविजित रहे ।
नेपालका लागि अविनाश बोहराले ३ ओभरमा २७ रन दिएर २ विकेट लिए । करण केसी, सोमपाल कामी, गुल्शन झा, ललित राजवंशी र सागर ढकालले १-१ विकेट लिए ।
नेपालले अब विश्वकप अघिको अन्तिम वार्म अप खेल बुधबार अमेरिकासँग खेल्ने छ ।
Rupee Exchange Rate