आरोही निर्मल पुर्जाको अन्त्यष्टी आज
पाकिस्तानको ब्रोड पिक आरोहणका क्रममा निधन भएका चर्चित नेपाली पर्वतारोही निर्मल पुर्जा ‘निम्सदाइ’को अन्त्येष्टि आज बुधबार बेलायतको डोर्सेटमा गरिँदै छ।
पारिवारिक स्रोतका अनुसार अन्तिम संस्कारमा परिवारका सदस्य र नजिकका आफन्त मात्र उपस्थित हुनेछन्। अन्त्येष्टि स्थलको सीमित क्षमता, सुरक्षा व्यवस्थाको आवश्यकता, परिवारको गोपनीयता र प्रतिकूल मौसमलाई ध्यानमा राख्दै ठूलो संख्यामा सहभागी गराउन नसकिने परिवारले जनाएको छ।
निम्सका दाइ कमलबहादुर पुर्जाले विज्ञप्तिमार्फत अन्त्येष्टि समारोहसम्बन्धी जानकारी दिएका हुन्। विज्ञप्तिमा यसअघि नाम दर्ता गराएका व्यक्तिहरूलाई मात्र समारोहमा उपस्थित हुन अनुमति दिइने उल्लेख छ। परिवारले ज्येष्ठ नागरिक र साना बालबालिकालाई समेत अन्त्येष्टिमा सहभागी नहुन आग्रह गरेको छ।
यद्यपि, निर्मल पुर्जाप्रति सार्वजनिक रूपमा श्रद्धाञ्जली अर्पण गर्न अन्त्येष्टि सम्पन्न भएपछि छुट्टै कार्यक्रम आयोजना गरिने भएको छ। उक्त कार्यक्रममा उनका सहकर्मी, शुभेच्छुक, नेपाली समुदाय तथा पर्वतारोहण क्षेत्रसँग सम्बन्धित व्यक्तिहरूले सहभागी भएर श्रद्धाञ्जली अर्पण गर्ने अवसर पाउनेछन्।
पुर्जा पाकिस्तानको काराकोरम हिमशृङ्खलामा रहेको ८ हजार ४७ मिटर अग्लो ब्रोड पिक आरोहणका क्रममा गत जुलाई ३० मा भएको दुर्घटनामा परेका थिए।
उक्त दुर्घटनामा पुर्जासहित ६ जना नेपालीको निधन भएको थियो।
विश्व पर्वतारोहण क्षेत्रमा आफ्नो छुट्टै पहिचान बनाएका पुर्जाको निधनपछि नेपालीसँगै अन्तर्राष्ट्रिय पर्वतारोहण समुदायमा समेत गहिरो शोक छाएको छ।
Rupee Exchange Rate