कोरियाले कागेश्वरीलाई प्लास्टिक रिसाइक्लिङ मेसिन दिने

काठमाडौं । काठमाडौंको कागेश्वरी मनोहरा नगरपालिकाको फोहोर व्यवस्थापनलाई अझै सहज बनाउन दक्षिण कोरियाले सहयोग गर्ने भएको छ।

कागेश्वोरी मनोहरा नगरपालिकाका नगर प्रमुख उपेन्द्र कार्कीसँग कोरियाका प्रतिनिधिले भेट गरेपछि यसबारे धारणा सार्बजनिक भएको हो। यो कुराले कागेश्वरी नगरपालिकाले फोहोर व्यवस्थापन र शैक्षिक अवसरहरूको क्षेत्रमा नयाँ कोसेढुङ्गा हासिल गरेको जनाएको छ।
दक्षिण कोरियाले नगरपालिकालाई उपहारको रूपमा ६० लाख मूल्यका दुई प्लास्टिक रिसाइक्लिङ मेसिनहरू प्रदान गर्ने प्रतिबद्धता जनाएको छ। यी मेसिनहरू विशेष गरी पानी र जुसको लागि प्रयोग हुने प्लास्टिकका बोतलहरू व्यवस्थापन गर्न प्रयोग गरिनेछ।
यो उदार सहयोग कोरिया फेसन डिजाइन व्यावसायिक तालिम केन्द्र र कोरिया रोजगार सहयोग केन्द्रका अन्तर्राष्ट्रिय अध्यक्ष प्रोफेसर योसेप काङ र सियोल जंगसिङका प्रोफेसर सेउङसुक चोले घोषणा गरेका हुन्।

रिसाइक्लिङ प्रणालीले प्रदूषण घटाउन, स्रोतहरूको संरक्षण गर्न र पुन: प्रयोगको संस्कृतिलाई प्रवर्द्धन गर्न योगदान पुर्‍याउनेछ।
यसले बालबालिकाहरूमा वातावरणीय चेतना जगाउन मद्दत गर्ने अपेक्षा पनि गरिएको छ।

यस अवसरमा, प्राध्यापक काङ र चोले नगरपालिकाले आफ्नो विश्वविद्यालयमा अध्ययन गर्न सिफारिस गरेका नेपाली विद्यार्थीहरूलाई छात्रवृत्ति अवसरहरू प्रदान गर्ने प्रतिबद्धता समेत व्यक्त गरे।

Comments