प्रधानमन्त्री प्रचण्डले दिए दशैंको शुभकामना (भिडियो)

काठमाडौं, ४ कात्तिक । प्रधानमन्त्री पुष्पकमल दाहाल प्रचण्डले भिडियो मार्फत बडादशैंको शुभकामना दिएका छन् । शनिबार विहान सामाजिक सञ्‍जालमा भिडियो सार्वजनिक गर्दै दशैंको शुभकामना सन्देश दिएका हुन् ।

उनले हामी अहिलेको अवस्थामा पछाडि फर्कन वा अहिलेकै यथास्थितिमा रुमल्लिने छुट आफूहरुलाई नभएको बताएका छन् । प्रचण्डले जनताको सुशासन, सामाजिक न्याय र समृद्धिको सपना पूरा गर्न दृढतापूर्वक अघि बढ्नैपर्ने बताएका छन्।

प्रधानमन्त्री प्रचण्डले शुभकामना सन्देशमा भनेका छन्, ‘पूर्वीय सभ्यता दर्शन, चिन्तन, परम्परा, संस्कृतिहरूका दृष्टिले हामी वैभवशाली र गौरवशाली छौं। हामीले नेपाली विशेषता र मौलिकताको सम्बर्द्धन एवं विकास गरेर ज्ञान, विज्ञान, सभ्यता र संस्कृतिको क्षेत्रमा नयाँ पहल लिन सक्छौं। यस दृष्टिले विविधतासहितको एकतामा आधारित हाम्रो समाज र संस्कृति संसारकै निम्ति अनुकरणीय र प्रेरणादायी रहेको छ। यसको जगेर्ना गर्दै बहुजातीय, बहुभाषिक, बहुसांस्कृतिक एवं बहुधार्मिक विशेषतामा आधारित देश समाज र संस्कृतिलाई थप समुन्नत तुल्याइँ राष्ट्रिय एकता र सद्भावलाई सुदृढ गर्नु हामी सबैको साझा दायित्व हो। योसँगै हाम्रा मौलिक पर्वहरू भित्र रहेका सकारात्मक र मानवीय जीवनमूल्यका संस्कार प्रवृत्तिको संरक्षण गर्दै त्यसभित्र विद्यमान रूढीवाद, अन्धविश्वास, भड्किलो चिन्तन र जीवनपद्धतिमा समयानुकूल परिवर्तन आवश्यक रहेकोमा म जोड दिन चाहन्छु।’

भिडियो:

Comments