टी२० विश्‍वकप: अभ्यास खेलमा बङ्गलादेशमाथि अफगानिस्तानको शानदार जीत

काठमाडौं, ३१ असोज । अस्ट्रेलियामा जारी टी२० विश्‍वकपअन्तर्गत सोमबार भएको अभ्यास खेलमा अफगानिस्तानले शानदार जीत निकालेको छ । अफगानिस्तानले बङ्गलादेशलाई ६२ रनले हराएको हो ।

अफगानिस्तानले दिएको १६१ रनको विजयी लक्ष्य पछ्याएको बङ्गलादेशले पूरा २० ओभर खेल्दै ९ विकेट गुमाएर ९८ रन मात्र बनाउन सक्यो । मोसद्देक हुसेनले सर्वाधिक २९ रन बनाए भने मेहदी हसनले १६ रन बनाए ।

अफगानिस्तानका फजलहक फारुकीले ३ विकेट लिँदा फरीद अहमदले ३ ओभरमा ९ रन मात्र खर्चेर २ विकेट लिए । मुजीब उर रहमानले ३ ओभरमा ५ रन मात्र खर्चिएर १ विकेट लिए । नवीन उल हक र कप्तान मोहम्मद नाबीले पनि १-१ विकेट लिए ।

त्यसअघि टस जितेर पहिले ब्याटिङ गरेको अफगानिस्तानले निर्धारित २० ओभरमा ७ विकेट गुमाएर १६० रन बनाएको थियो । इब्राहिम जाद्रानले ४६ रन बनाए भने कप्तान नाबी १७ बलमा ५ छक्कासहित ४१ रनमा अविजित रहे । बङ्गलादेशका तस्किन अहमदले ३ विकेट लिँदा शाकिब अल हसन र हसन महमुदले २-२ विकेट लिए ।

सुपर १२ को खेल सुरु हुनुअघि ८ वटा टोलीले अभ्यास खेल खेलिरहेका छन् । आजै भएको अर्को खेलमा भारतले अस्ट्रेलियामाथि भारतले रोमाञ्‍चक जीत निकाल्दा पाकिस्तानलाई इंग्ल्यान्ड तथा न्युजिल्यान्डलाई दक्षिण अफ्रिकाले हरायो ।

Comments