मनाङलाई हराउँदै एपिएफ चितवन गोल्डकपको फाइनलमा
चितवन, ३१ भदौ । विभागिय टोली एपिएफ क्लब चितवनको भरतपुरमा जारी चितवन गोल्डकप फुटबलको फाइनलमा प्रवेश गरेको छ । शुक्रबार भएको सेमिफाइनलमा मनाङ एफसीलाई १-० गोलअन्तरले हराउँदै एपिएफ उपाधि नजिक पुगेको हो ।
एपिएफको जीतमा हरि कार्कीले गरेको एकमात्र गोल नै निर्णायक बनेको थियो । दोस्रो हाफ सुरु भएको केही समयमा नै क्विक थ्रो बाट आएको बललाई हरिले बाँया खुट्टाले पोस्टको दिशा दिँदा एपिएफले अग्रता लियो ।
त्यसपछि थप गोल भएनन् र एपिएफले फाइनलको यात्रा तय गर्यो । खेलको अन्त्यतिर मनाङका पुजन उपरकोटीले रातो कार्ड पाएपछि मनाङ १० खेलाडीमा समेटिएको थियो ।
रेफ्री श्याम दनुवारले खेल सकिएको सिट्ठी फुक्नेबित्तिकै मनाङका अफिसियल मैदानमा प्रवेश गरेर रेफ्रीमाथि आक्रोशित बनेका थिए । दर्शक पनि मैदानमा प्रवेश गरेर रिस पोखिरहेका थिए ।
एपिएफले अब उपाधिका लागि नेपाल आर्मी र एभिनुर एफसीबीचको विजेतासँग प्रतिस्पर्धा गर्ने छ । शनिबार दिउँसो दोस्रो सेमिफाइनलमा एभिनुर एफसी क्यामरुन र नेपाल आर्मी क्लब भिड्नेछन् ।
Rupee Exchange Rate