केन्यासँगको दोस्रो टी-२०आई खेलमा नेपाल पराजित
काठमाडौं, १० भदौ । केन्या भ्रमणमा रहेको नेपाली क्रिकेट टोली केन्यासँगको टी-२०आई श्रृंखलाअन्तर्गत दोस्रो खेलमा पराजित भएको छ । शुक्रबार भएको दोस्रो खेलमा केन्याले नेपाललाई १७ रनले हराएको हो ।
१३३ रनको विजयी लक्ष्य पछ्याएको नेपाल १९ ओभरमा ११४ रनमा अलआउट भयो । नेपालका आरिफ शेखले रनआउट हुनुअघि सर्वाधिक २५ रन बनाए भने आदिल अन्सारी र रोहित पौडेल समान २० रनमा आउट भए ।
केन्याका इमानुयल बुन्डी, लुकास ओलोच र भ्राज पटेलले २-२ विकेट लिँदा युजीन ओचीङ र नेमिया ओडियाम्बोले १-१ विकेट लिए ।
त्यसअघि टस हारेर ब्याटिङ गरेको केन्याले निर्धारित २० ओभरमा ९ विकेट गुमाएर १३२ रन बनाएको थियो । राकेप पटेलले ३५ रन बनाए भने नेमिया ओडियाम्बोले २९ रनको योगदान दिए ।
नेपालका दिपेन्द्रसिंह ऐरी र सन्दीप लामिछानेले ३-३ विकेट लिए भने करण केसीले २ तथा पवन सर्राफले १ विकेट लिए ।
योसँगै पाँच खेलको श्रृंखला १-१ को बराबरीमा पुगेको छ ।
Comments
Rupee Exchange Rate