नागढुङ्गामा भएको मोटरसाइकल दुर्घटनामा एकको मृत्यु
काठमाडौं, २५ साउन । पृथ्वी राजमार्गअन्तर्गत नागढुङ्गाको झ्याप्लेखोलामा बुधबार दिउँसो भएको सवारी दुर्घटनामा एकजनाको ज्यान गएको छ । मोटरसाइकल चिप्लिएर बसको मूनि पर्दा मोटरसाइकल चालकको ज्यान गएको हो ।
चितवनबाट काठमाडौं आउँदै गरेको बसको पछिपछि आइरहेको मोटरसाइकल झ्याप्लेखोलामा आइपुग्दा अनियन्त्रित भएर पल्टिएपछि चालक उछिट्टिएर बसको टायरमूनि नै पर्दा घटनास्थलमै ज्यान गएको हो ।
मृत्यु हुनेमा बझाङ स्थायी घर भई धनगढी बस्दै आएका २६ वर्षीय पृथ्वी बहादुर ग्वाल रहेका छन् । अध्ययनको सिलसिलामा धनगढी बस्दै आएका उनी मङ्गलबार विहान आफ्नै पल्सर बाइकमा काठमाडौं जान निस्किएका थिए ।
राति ९ बजेको समयमा चितवन पुगेर लजमा बसेका उनी बुधबार विहान चितवनबाट प्रस्थान गरेको उनीसँगै धनगढीबाट आएका अर्का मोटरसाइकल चालकले जानकारी दिए ।
घटनापछि बस र चालक प्रहरीको नियन्त्रणमा रहेका छन् । बसका यात्रुलाई अर्को बसमा काठमाडौं पठाइएको छ ।
Comments
Rupee Exchange Rate