रातिदेखि अवरुद्ध नारायणगढ-मुग्लिन सडक सञ्चालनमा आउन सकेन
परेवान्युज
|
श्रावण १७ गते, २०७९ - १३ः०३ मा प्रकाशित
-फाइल तस्वीर
चितवन, १७ साउन । अविरल वर्षापछि खसेको पहिरोका कारण अवरुद्ध बनेको चितवनको नारायणगढ-मुग्लिन सडकखण्ड अझै सञ्चालनमा आउन सकेको छैन ।
लामो समयसम्म सडक अवरुद्ध भएपछि यात्रुहरु बाटोमै अलपत्र परेका छन् । यो सडक अवरुद्ध हुनाले पूर्वपश्चिम राजमार्ग समेत प्रभावित भएको छ । गाडीको लामो लाइन लागेको छ ।
पश्चिमतिरबाट आएका सवारीहरुलाई नवलपुरमै रोकिएको छ । नवलपुर हुँदै पोखरा तथा काठमाडौं जाने सवारी साधन जिल्लामै रोकिएको ट्राफिक प्रहरीले जनाएको छ ।
भरतपुर महानगरपालिका-२९ स्थित केराबारी, १७ किलो तथा इच्छाकामनाको ३ नम्बर पुलनजिकै पहिरो खसेपछि रातिदेखि सडक अवरुद्ध बनेको थियो ।
पहिरो पन्छाउने काम भइरहे पनि समय लाग्ने देखिएकोले आज पनि दिनभर यातायात अवरुद्ध हुनसक्ने ट्राफिक प्रहरीको भनाइ छ ।
उता पृथ्वी राजमार्गअन्तर्गत धादिङको तिङ्ग्राङखोलामा पनि पहिरो खस्दा राजमार्ग अवरुद्ध भएको थियो ।
Rupee Exchange Rate