जिम्बावेले बङ्लादेशलाई हरायो
काठमाडौं, १५ साउन । बङ्गलादेशसँगको टी२० श्रृंखलामा घरेलु टोली जिम्बावेले विजयी सुरुवात गरेको छ । शनिबार भएको पहिलो खेलमा जिम्बावे १७ रनले विजयी भएको हो ।
२ सय ६ रनको विजयी लक्ष्य पछ्याएको बङ्लादेशले पूरा २० ओभर खेल्दै ६ विकेट गुमाएर १८८ रन मात्र बनाउन सक्यो । नुरुल हसन ४२ रनमा अविजित रहे भने नजमोल होसेनले ३७ तथा लिटोन दासले ३२ रन बनाए ।
जिम्बावेका लुक जोङ्वेले २ विकेट लिए भने रिचार्ड गारभा वेलिङ्टन मसाकाड्जा र सिकन्दर राजाले १-१ विकेट हात पारे ।
त्यसअघि टस जितेर पहिले ब्याटिङ गरेको जिम्बावेले निर्धारित २० ओभरमा ३ विकेट गुमाएर २ सय ५ रन बनाएको थियो । उसका वेस्ले माधेभेरे ६७ रनमा रिटायर्ड हर्ट भएका थिए भने सिकन्दर राजाले ६५ रनमा अविजित रहे ।
बङ्लादेशका मुस्तफिजुर रहमानले २ तथा मोसड्डेक हुसेनले १ विकेट लिए ।
दोस्रो टी-२० खेल आज हुनेछ ।
Rupee Exchange Rate