वेस्टइन्डिजमाथि भारतको रोमाञ्चक जीत
काठमाडौं, ७ साउन । वेस्टइन्डिज भ्रमणमा रहेको भारतीय क्रिकेट टोलीले एकदिवसीय श्रृंखलाअन्तर्गत पहिलो खेलमा घरेलु टोलीमाथि रोमाञ्चक जीत निकालेको छ । भारतले वेस्टइन्डिजलाई ३ रनले हराएको हो ।
३ सय ९ रनको विजयी लक्ष्य पछ्याएको वेस्टइन्डिजले पूरा ५० ओभर खेलेर ७ विकेटको क्षतिमा ३ सय ५ रन मात्र बनाउन सक्यो । उसका लागि काइल मेयरले सर्वाधिक ७५ रन बनाए भने ब्रान्डन किङले ५४ तथा शामराह ब्रुक्सले ४६ रन बनाए ।
रोमारियो शेपहर्ड ३९ तथा अकिल होसेन ३२ रनमा अविजित रहे । भारतका मोहम्मद सिराज, शार्दुल ठाकुर र युजुभेन्द्र चहलले २-२ विकेट लिए ।
त्यसअघि टस हारेर पहिले ब्याटिङको निम्तो पाएको भारतले निर्धारित ५० ओभरमा ७ विकेट गुमाएर ३ सय ८ रन बनाएको थियो । उसका लागि शिखर धवनले ९७ रन बनाए भने शुभमन गिलले ६४ तथा श्रेयस अय्यरले ५४ रन बनाए ।
वेस्टइन्डिजका अल्जारी जोसेफ र गुडाकेश मोटीले २-२ विकेट लिए भने रोमारियो शेपहर्ड र अकिल होसेनले १-१ विकेट हात पारे ।
दोस्रो एकदिवसीय खेल आइतबार हुनेछ ।
Comments
Rupee Exchange Rate