परेवान्युज
|
आषाढ़ २९ गते, २०७९ - २२ः१९ मा प्रकाशित
फाइल तस्वीर: क्यान
काठमाडौं, २९ असार । स्कटल्यान्ड भ्रमणमा रहेको नेपाली क्रिकेट टोलीले आइसिसी विश्वकप लिग २ अन्तर्गत यस श्रृंखलाको दोस्रो खेलमा शानदार जीत निकालेको छ । नेपालले स्कटल्यान्डलाई ५ विकेटले हराएको हो ।
नेपालले स्कटल्यान्डलाई कुनैपनि हराएको यो पहिलोपटक हो । स्कटल्यान्डसँग यसअघि खेलिएका चारवटै खेलमा नेपाल पराजित भएको थियो । त्यसकारण आजको जीत ऐतिहासिक जीत बनेको छ ।
१४५ रनको विजयी लक्ष्य नेपालले २५.१ ओभरमा ५ विकेटको क्षतिमा भेट्टायो । नेपालका लागि आसिफ शेखले सर्वाधिक ७१ रनको योगदान दिए । त्यसैगरी रोहितकुमार पौडेल ३४ रनमा अविजित रहे । स्कटल्यान्डका गाभिन मेनले ३ विकेट लिँदा रिची बेरिङटन र आड्रियन निलले १-१ विकेट लिए ।
त्यसअघि टस हारेर पहिले ब्याटिङ गरेको स्कटल्यान्ड ४२.५ ओभरमा अलआउट हुँदै १४४ रन बनाएको थियो । उसका लागि गाभिन मेनले अविजित रहँदै सर्वाधिक ६४ रन बनाए । नवौं नम्बरमा ब्याटिङ गर्न आएका मेनको यो करियरकै उच्च स्कोर पनि थियो ।
९५ रनमा ९ विकेट गुमाइसकेको स्कटल्यान्डले अन्तिम विकेटमा ४९ रन बनाएको हो । सुरुवातदेखि नै निरन्तर विकेट गुमाइरहेको स्कटल्यान्डले मेनको ब्याटिङबाट सम्मानजनक स्कोर खडा गर्न सफल रह्यो ।
नेपालका लागि सोमपाल कामी र आदिल अन्सारीले ३-३ विकेट लिँदा कप्तान सन्दीप लामिछानेले २ तथा करण केसी र दीपेन्द्रसिंह ऐरीले १-१ विकेट लिए ।
जीतपछि नेपाल लिग टु को तालिकामा १८ खेलबाट १७ अंकसहित पाँचौं स्थानमा उक्लिएको छ भने स्कटल्यान्ड २२ खेलबाट ३० अंकसहित दोस्रो स्थानमा यथावत् छ ।
Rupee Exchange Rate