एक वर्षमा पाथीभरामा ३ करोड भेटी, २ लाख २१ हजार दर्शनार्थी
ताप्लेजुङ । ताप्लेजुङस्थित प्रसिद्ध धार्मिकस्थल पाथीभरा मन्दिरमा विसं २०८१ मा दुई लाख २१ हजार भन्दा बढी भक्तजनले दर्शन गरेका छन्।
सोही अवधिमा झन्डै तीन करोड पाँच लाख रुपैयाँभन्दा बढी भेटी संकलन भएको छ।पाथीभरा क्षेत्र विकास समितिका अनुसार, वर्षभरिमा दुई लाख २१ हजार ६०२ जना दर्शनार्थीले मन्दिरको दर्शन गरेका थिए। तीमध्ये सबैभन्दा बढी कात्तिकमा ६१ हजार १७३ भक्तजन पाथीभरा पुगेका थिए। उक्त अवधिमा कुल तीन करोड पाँच लाख ५६ हजार १२ रुपैयाँ भेटी सङ्कलन भएको समितिले जनाएको छ।
आम नागरिक र सञ्चारकर्मीलाई जानकारी दिन तथा पारदर्शिता सुनिश्चित गर्न समितिले मासिक रूपमा दर्शनार्थी र भेटीको विवरण सार्वजनिक गर्दै आएको छ।
समितिका कार्यकारी निर्देशक प्रजिन हाङबाङका अनुसार पछिल्लो समय भारतसहित विभिन्न देशबाट श्रद्धालुहरूको उल्लेखनीय आगमन भइरहेको छ। साथै, पारदर्शिता कायम राख्न मासिक विवरण प्रकाशनको अभ्यासलाई निरन्तरता दिइएको छ।रासस
Rupee Exchange Rate